اردو میں “نے” اور “کو” کا استعمال

اردو میں “نے” اور “کو” کا استعمال

اردو گرامر میں “نے” اور “کو” کا استعمال فاعل اور مفعول کو واضح کرنے کے لیے ہوتا ہے۔ ان دونوں الفاظ کو بالترتیب علامت فاعل اور علامت مفعول بھی کہا جاتا ہے۔ اس بلاگ میں ہم “نے” اور “کو” کے استعمال کو مثالوں کی مدد سے تفصیل سے سمجھیں گے، اور ساتھ ہی فعل تام اور فعل ناقص پر بھی روشنی ڈالیں گے۔

“نے” اور “کو” کا استعمال

“نے” کا استعمال عموماً فاعل (جو عمل کو انجام دے) کے لیے ہوتا ہے، جبکہ “کو” کا استعمال مفعول (جس پر عمل واقع ہو) کے لیے کیا جاتا ہے۔

مثالیں:۔

ناصر نے جاوید کو مارا۔
اس نے طاہر کو بھیجا۔
میں نے اکرم کو بلایا۔
ماں نے بچے کو چپ کرایا۔

مندرجہ بالا مثالوں میں “نے” فاعل کو ظاہر کر رہا ہے اور “کو” مفعول کو، جس پر عمل واقع ہو رہا ہے۔

فعل کی اقسام: فعل تام اور فعل ناقص

اردو میں فعل کی دو اہم اقسام ہیں: فعل تام اور فعل ناقص۔ ان دونوں کی تعریف اور استعمال کو ہم مثالوں کے ساتھ واضح کریں گے۔

فعل تام

فعل تام وہ فعل ہے جو فاعل کا ذکر کر دینے کے بعد مکمل معنی دیتا ہے۔ اگر فعل لازم ہو، تو صرف فاعل کا ذکر معنی مکمل کرنے کے لیے کافی ہوتا ہے، جبکہ فعل متعدی میں فاعل اور مفعول دونوں کا ذکر کرنے کے بعد معنی مکمل ہوتے ہیں۔

مثالیں:۔

سعید آیا۔
وسیم نے دیکھا۔
اسلم نے پڑھا۔

ان مثالوں میں فاعل کے ذکر کے بعد فعل اپنے معنی مکمل کر رہا ہے۔

اگر فعل متعدی ہو تو:۔

حمید مسجد سے آیا۔
اسلم نے کبوتر دیکھا۔
نازیہ نے کتاب پڑھی۔

یہاں فاعل اور مفعول دونوں کے ذکر سے معنی مکمل ہو رہے ہیں۔

فعل ناقص

فعل ناقص وہ فعل ہے جس کے معنی تب تک مکمل نہیں ہوتے جب تک دوسرے اسم کا ذکر نہ کیا جائے۔ فعل ناقص میں کوئی حالت یا وصف ظاہر کیا جاتا ہے، جیسے کہ کسی کی صفت، حالت، یا کیفیت بیان کرنا۔

مثالیں:۔

ثانیہ نیک ہے۔
جاوید خوبصورت بچہ ہے۔
شازیہ چالاک ہے۔
بچہ ذہین ہے۔
لڑکا تیز ہے۔
سکول بڑا ہے۔

فعل ناقص میں استعمال ہونے والے الفاظ درج ذیل ہیں: “ہے”، “وہ”، “ہوا”، “ہوئی”، “ہوئے”، “ہوگا”، “تھا”، اور “تھی” وغیرہ۔